Da man do autor imos comezar unha viaxe lírica coa poeta Rosalía de Castro. Saímos de Bastavales cara aos recordos da infancia e acompañados de sereas, caracolas, pombas, dos nosos amigos animais que aparecen paseniño no camiño (o galo, a mosca, o can, a araña, o verme), sempre deixándonos abraiar pola maxia da natureza (solpores, ventos, piñeiros, néboa, chuvia...).
É un libro cheo de verbas fermosas, xogos e trabalinguas, polo camiño do amor cara a esa importante poeta galega que foi Rosalía e coa luz de cores das acuarelas de Xosé Cobas.