Coa lectura deste relato poderás coñecer unha lenda galega moi famosa que fala da existencia da trabe de ouro e a de alcatrán e a tradición que existe en Fisterra sobre a existencia da Vaca de Fisterra, que a autora coñeceu un día no que se comunicaron o mundo da realidade e o da fantasía. Pero tamén poderás saber o que aconteceu hai moitos anos, nos tempos en que os dragóns tiñan moito poder no mundo, no reino de Duio, grazas ás memorias de Basilio, o Dragón de Duio.
Este personaxe conta como transcorreu todo dende que Duio foi sitiada por Carlomagno, que cobizaba a trabe de ouro soterrada baixo terra, descoñecendo que ía aparellada cunha trabe de alcatrán que pon en perigo o mundo. Cando a atopou, o reino quedou asolagado e o dragón Basilio púxoo a salvo cun encantamento no outro lado da terra, en Milmontes.
Moitos anos despois, un rapaz chamado Miro chega a Milmontes ao atopar por casualidade o torques de ouro do Dragón, e alí coñece como é escola e aprende materias que no seu mundo non se estudan. Ademais, namórase da súa compañeira Morgana coa que vive unha serie de aventuras na súa loita por salvar o reino e defender os seus sinais de identidade, enfrontándose aos que queren cubrir a cidade de cemento. Na busca do corgo de lume terán que vencer a moitos seres que ameazan a súa vida, pero grazas ao saber de Morgana conseguen saír vitoriosos, aínda que Miro terá que pagar un alto prezo.