Esta novela recrea a historia de Bia, unha rapaza da familia dos Medici que apareceu na súa tumba cun armiño aos seus pés e un diario no que contaba a súa vida que é o que se reproduce. Nel, Bia, filla ilexítima do duque de Florencia Cosimo I, relata a súa vida dende que se trasladou a vivir da aldea ao palacio de seu pai e foi convertida de aldeá en princesa.
Os cambios que sofre a súa vida son en xeral positivos pois ten unha educación esmerada e comparte experiencias cos seus irmáns e irmás, aínda que tamén debe aceptar os costumes da nobreza do século XVI e obedecer a seu pai cando este decide casala cun home ao que non coñece de nada.
Bia ten que renunciar ao seu verdadeiro amor, un rapaz de Siena ao que coñeceu nunha viaxe e co que viviu unha historia de amor sen que ninguén o soubese.
Ademais da historia de Bia, no prólogo e no epílogo do libro cóntase o que sucedeu coa familia dos Medici.