¿Como identificarías unha verdadeira bruxa se aparenta ser unha persoa normal? ¿Como as vencerías se te converten nun neno-rato? ¿Que farías se intentan matar a todos os nenos e nenas do mundo? Unha posible resposta a todas estas preguntas agóchase na aventura que vive o protagonista desta historia do famoso escritor Roald Dahl que podes ler en galego xa que foi traducida no ano 1989.
Este neno orfo axudarache a saber como descubrir unha verdadeira bruxa ao contarche o que lle ensina a súa avoa sobre ese tema. Grazas a eles descobre que un grupo de señoras defensoras dos dereitos dos nenos son en verdade unha asociación de bruxas que desexan eliminar a todos os nenos e nenas do mundo.
Pero non te equivoques; nesta novela as bruxas non son as mulleres vellas e con vasoira que estamos afeitos a ver. Son señoras da alta sociedade, con traballos normais, cunha vida coma a de calquera de nós pero con dúas características que as diferencian e que poden dar pistas: teñen os pés cadrados e sen dedas, ademais de levar luvas para ocultar as gadoupas que teñen por mans.
Mais non todo é sinxelo na loita na que se ve envolto o protagonista: ao descubrir as súas maléficas intencións, estas mulleres transformarano nun neno-rato e en colaboración coa súa avoa terá que loitar contra o exército de bruxas para intentar desfacerse delas.