Preparádevos para tomar un zume do máis estimulante. Estas laranxas son as máis refrescantes, as máis sorprendentes, as máis grandes do mundo...
Nesta peza teatral descubrirás o que aconteceu na hortiña de Elías e Anxa o día que estouraron aquelas laranxas tan particulares e como os veciños (o Toneladitas, o home da escopeta, a veciña desdentada, a veciña sabia) querían amañar aquela desfeita.
Seguro que che dá a risa ao coñecer a galiña Petra e o seu xeito de poñer ovos de cores, co rebumbio que se forma cando Anxa se trabuca de conto para intentar abrilo. Na escena comezan a acontecer feitos inexplicables, onde a galiña fala, o ovo protesta polo xeito de cascalo, ao veciño gordo verdécelle a cara coa fame, e un final onde logo de abrir o ovo temos agasallos para todos.
Estás diante dunha peza de teatro onde a imaxinación vai do real ao fantástico e ao absurdo, un desafío a toda a lóxica dos adultos. Comeza así, en 1973, o teatro fantástico da LIX galega. ¡Atrévete a descubrilo!