No momento que abrades este libro sentirédesvos atrapados pola particular sensibilidade do autor, que foi quen de achegarvos os grandes poetas galegos para que os coñezades. A través das súas páxinas descubriredes moitos homes e mulleres que, ao longo do tempo, dignificaron a nosa lingua coas súas creacións.
Antonio García Teijeiro establece un diálogo con estes poetas de todos os tempos, coa intención de acabar de vez cunha "débeda que tiña con eles". A través dos vinte e nove poemas que compoñen o libro coñeceredes creacións de vellos trobadores medievais como Martín Codax ou Pero Eanes; das grandes figuras do Rexurdimento, como Rosalía de Castro, Manuel Curros Enríquez e Eduardo Pondal; e outras moitas figuras importantes das nosas letras, como Ramón Cabanillas, Manuel Antonio, Luís Pimentel, Álvaro Cunqueiro, Celso Emilio Ferreiro..., até chegar aos poetas actuais como X.L. Méndez Ferrín, Xohana Torres, Luz Pozo Garza, Bernardino Graña ou Álvarez Cáccamo, entre outros.
Sorprenderavos como o amor, a beleza, o mar, a inxustiza, a emigración, os recordos da infancia e outros moitos temas son retomados por García Teijeiro coa súa propia voz, dun xeito que nunca se dixeran, desbordando ritmo e musicalidade. Segundo me dixo nunca ocasión a súa máxima aspiración foi conseguir que os nenos e as nenas aprendesen a amar a poesía.
Estou seguro que con libros coma este esa tarefa, que nun principio pode parecer difícil, está máis preto de conseguirse.
|
