Quizais
ides pensar que son un fachendoso pero nesta ocasión
quixen presentarvos os novos títulos da miña
colección. Si, si, por se non o sabiades teño
a miña propia colección de libros, cheíña
de contos de maxia, de misterio e de aventuras que encargo
persoalmente aos mellores creadores e creadoras da literatura
infantil e xuvenil galega. Faríadesme moi feliz se
os lésedes así que non dubidedes en pedilos
na biblioteca que teñades máis próxima.
Isto da edición évos un
traballiño ben complicado. Veredes, cómpre
contactar cos escritores e escritoras para que inventen
as historias, encargar as ilustracións, poñer
os textos ben bonitiños (é o que se chama
maquetación), levalos á imprenta, encadernalos,
en fin…, unha chea de cousas ata rematar. ¡Buf,
colegas, que choio! O resultado son estes libros que penso
que quedaron ben chulos ¿non si? Aquí, entre
nós, o meu pai, Xan (xa vos irei falando del), tamén
andou a fume de carozo para telo todiño listo. Pero
ao final aquí están, os seis novos títulos
da colección “O lagarto pintado” acabados
de saír do forno, pensando nos vosos gustos e nas
vosas idades. E abonda xa que cando me poño a escribir…
|
